Градоначалникот на Град Скопје Трифун Костовски утре ќе го посети булеварот Никола Карев.Со посетата на Костовски, како што соопшти Одделението за односи со јавност на Град Скопје, официјално ќе почне реконструкција на тротоарите на овој булевар познат како пластичарска улица.

Испекциските служби на општина Кисела Вода минатата недела посетија 130 дуќани, фирми, кафетерии и претпријатија кои егзистираат на територијата на општината и ги користат јавните пешачки површини и тротоари за комерцијални цели. Според инспекциските служби, за користење на тие површини од дуќаните, фирмите и кафетериите за комерцијална цел, ќе мораат да побараат одобрение од општината кое пак произлегува од Законот за Град Скопје и донесените законски одредби од страна на Советот на општината Кисела Вода.

Советот на општина Кисела Вода на седницата одржана во петокот го усвои Предлогот за донесување Одлука на Деталниот урбанистички план УСЈЕ-Мало стопанство.

Радио такси компанијата КОМАК-КОМЕРЦ в среда, на денот на парламентарните избори, од 9 до 12 часот бесплатно ќе ги вози скопјани од нивните домови до гласачките места. Заинтересираните граѓани можат да повикаат бесплатно такси на телефонот 151-93, информираат од Компанијата.

Архиепископот орхидски и македонски г.г. Стефан денеска ќе го освети камен темелникот на камбанаријата на црквата Свети Илија во општина Аеродром.

Град Скопје ги повикува политичките партии да престанат да лепат плакати и предизборен материјал на места кои не се наменети за тоа и најдоцна 30 дена по завршувањето на изборите да ги отстранат своите плакати од урбаната опрема и од  јавните површини.

Поради зачестеното и неконтролирано лепење на плакатите на стебла од дрвја, на заштитните огради на булеварите и на електричните столбови во градот, како и на неодамна бојосаната фонтана Лотос во Градскиот парк, Град Скопје укажува дека не се почитуваат комуналниот ред и одлуката на Советот на Град Скопје со која беа одобрени паноа за бесплатно рекламирање на политичките партии.

Плакатите излепени на недозволени места го нарушуваат изгледот на градот и затоа ги повикуваме политичките партии да ги отстанат за да придонесат за зачувување на комуналниот ред и хигиената во градот, се вели во соопштението на Град Скопје.

Советот на општина Бутел на денешната седница го усвои предлогот 1-ви јули да биде официјален празник на Општината. Како што соопштува Службата за информирање на општина Бутел, станува збор за денот кога официјално почна да се применува Законот за територијална организација на локалната самоуправа, според кој и беше формирана новата општина Бутел.

Општина Аеродром почна со изградба на нов парк во Долно Лисиче на местото на поранешниот парк познат како 88 садници за Тито. Паркот, како што информираат од Општината, веќе е расчистен и земјата е израмнета, а во моментов се работи на нејзино нивелирање до одредена висина. Во текот на неделава ќе почне и изградбата на пешачки патеки, а потоа ќе следи осветлување на паркот, каде што ќе бидат поставени и нови канделабри и клупи, а ќе се направи и мини детско паркче со лулашки. Изградбата на паркот треба да заврши до трети јули годинава.

Градоначалникот на Општина Аеродром, Кирил Тодоровски ја прими македонската претставничка на овогодишниот евросонг, Елена Ристеска.

На средбата, градоначалникот Тодоровски, како што е наведено во соопштението од неговиот Кабинет, и го честиташе постигнатиот пласман на Ристеска, посакувајќи и натамошни успеси. Покрај тоа, на средбата станало збор и за соработката што Општина Аеродром и ја нуди на младата пејачка, заедно со други музички ѕвезди, преку журки на отворено, да се подигне на повисоко ниво културниот живот во Аеродром.

Инаку, Елена, поради успехот на Евросонг 2006, со песната Нинанајна, со која го освои 12-то место во Атина, досега највисока позиција за Македонија, го доби и епитетот гордост на Аеродром, чија жителка е младата популарна пејачка.